فوتو: ن. بايبۋلين
سالتاناتتى راسىمگە قاتىسۋشىلاردى ايتۋلى مەرەكەمەن قۇتتىقتاعان ماۋلەن اشىمباەۆ جەڭىس كۇنى ەل تاريحىندا جانە ءاربىر قازاقستاندىقتىڭ ومىرىندە ەرەكشە ورىن الاتىن داتا ەكەنىن اتاپ ءوتتى. وسىعان بايلانىستى مەملەكەت باسشىسىنىڭ تاپسىرماسىمەن بارلىق وڭىردە ۇلى جەڭىستىڭ 80 جىلدىعىنا ارنالعان ءىس-شارالار وتكىزىلىپ جاتقانى ايتىلدى.
«جەڭىس كۇنى – قازاقستان حالقى ءۇشىن ايرىقشا ماڭىزعا يە مەرەكە. بيىل مەرەيلى داتاعا وراي پرەزيدەنتىمىز قاسىم-جومارت كەمەل ۇلى توقاەۆتىڭ تاپسىرماسىمەن ەلىمىز بويىنشا اۋقىمدى ءىس-شارالار وتكىزىلىپ جاتىر. سونىڭ اياسىندا 7 مامىر كۇنى استانادا اسكەري شەرۋ ۇيىمداستىرىلعانى بەلگىلى. ال, بۇگىن ءبىز كەڭەس وداعىنىڭ باتىرى, قازاقتىڭ قاھارمان قىزى مانشۇك مامەتوۆانىڭ ەسكەرتكىشىنە ارنايى كەلىپ تۇرمىز. مانشۇك مامەتوۆا 20 جاسقا تولار-تولماس شاعىندا ءوز ەركىمەن مايدانعا اتتانىپ, باتىرلىق پەن قايسارلىقتىڭ وزىق ۇلگىسىن كورسەتتى. ءبىز كەلەر ۇرپاقتىڭ بەيبىت زامانى ءۇشىن ءوزىنىڭ ءومىرىن قۇربان ەتكەن مانشۇك مامەتوۆانىڭ جانە بارلىق مايدانگەردىڭ ەرلىكتەرىن ەشقاشان ۇمىتپايمىز. سوعىسقا قاتىسقان اعا بۋىندى ارداقتاپ, رۋحتارىنا تاعزىم ەتۋ – ءبىزدىڭ ازاماتتىق پارىزىمىز», دەگەن ماۋلەن اشىمباەۆ ارداگەرلەرگە زور دەنساۋلىق جانە ولاردىڭ وتباسىلارىنا باق-بەرەكە تىلەدى.
سونىمەن قاتار بۇگىن پالاتا سپيكەرى ءبىر توپ دەپۋتاتپەن بىرگە سوعىس ارداگەرى ۆاسيلي سەرديۋكوۆتى جەڭىس كۇنىمەن قۇتتىقتادى. ۆاسيلي سەرديۋكوۆ 1943 جىلى 17 جاسىندا مايدانعا اتتانعان. كەزدەسۋدە ارداگەر قۇتتىقتاپ كەلۋشىلەرگە ءوز العىسىن ءبىلدىرىپ, باتاسىن بەردى.
ۆاسيلي انتونوۆيچ سوعىس جىلدارىندا بەلارۋسسياداعى ارتيللەريالىق اسكەر قاتارىندا جانە 26-شى مينومەت بريگاداسىندا بولىپ, مينسك پەن ۆارشاۆانى ازات ەتۋگە قاتىستى. سونداي-اق ول جەڭىستى رەيحستاگتا ءجۇرىپ قارسى العانىن اتاپ وتكەن ءجون.
